Sot, Agjencia Kosovare e Pronës (AKP) ka nxjerr botimin e parë të gazetës së saj zyrtare. Gazeta do të publikohet çdo muaj dhe do të botojë artikuj lidhur me punën e AKP-së, por çka është më e rëndësishme, listën e të gjitha kërkesave të paraqitura në AKP.

Listat e kërkesave do të përmbajnë informata si llojin e pronës, numrin e rrugës, numrin e apartamentit, numrin e ngastrës, komunën dhe fshatin e pronës së kërkuar. AKP-ja publikon listat e kërkesave me qëllim të njoftimit të personave që mund të kenë interesa ligjore në pronat e kërkuara lidhur me kërkesat e paraqitura.

Gazeta e AKP-së është botuar në gjuhët shqipe dhe serbe dhe është duke u shpërndarë si shtojcë përmes gazetave  Kosova Sot dhe Jedinstvo. Përveç kësaj, Gazeta e AKP-së mund të gjendet në të gjitha komunat dhe gjykatat vendore si dhe në ueb faqen tonë www.kpaonline.org. Versioni në gjuhën angleze i Gazetës së KPA-së po ashtu mund të gjendet online.

Publikimi i kërkesave në Gazetën e AKP-së ka efekt juridik. Kushdo që beson se ka interesa ligjore në cilëndo pronë të kërkuar të paraqitur në listë duhet të kontaktojë Agjencinë Kosovare të Pronës sa më shpejtë që të mundet dhe atë brenda 30 ditëve  nga data e publikimit të kërkesës. Nëse personi me interes potencial ligjor nuk përgjigjet brenda afatit kohor 30 ditor të përcaktuar me ligj, AKP-ja apo Komisioni i Kërkesave Pronësore të Kosovës (KKPK) mund të lëshojë urdhër që mund të ndikojë në të drejtat e tij/saj ndaj pronës së kërkuar pa paralajmërim shtesë.

Krahas publikimit të kërkesave të paraqitura në Gazetën zyrtare të AKP-së, AKP-ja gjithashtu kryen notifikimin fizik për secilën pronë të kërkuar duke vendosur njoftim ligjor në secilën pronë të kërkuar.

Kliko këtu për të lexuar Gazetën e AKP-së