Drejtori i ri Ekzekutiv i AKP-së merr detyrën

Pas emërimit të tij të bërë nga ana e Kryeministrit të Kosovës, z. Hashim Thaçi, në konsultim edhe me Përfaqësuesin Special të Bashkimit Evropian në Kosovë, z Marian Nieora që nga 1 prilli 2013 ka nisur punën si Drejtor Ekzekutiv i Agjencisë Kosovare të Pronës.

Marian është diplomuar në Universitetin Surrey në Angli. Ai ka punuar në projekte të ndryshme zhvillimore, në Angli, Kanadë, Norvegji, Bullgari dhe  Poloni.

Në vitin 2001 Marian erdhi në Kosovë  dhe u emërua Udhëheqës i Rajonit të Prishtinës në Departamentin e Përkohshëm të Tregtisë dhe Industrisë dhe në njëjtën pozitë vazhdoi punën edhe në Agjencinë Kosovare të Mirëbesimit. Atje Marian ishte përgjegjës për administrimin dhe udhëheqjen e  mbi 150 Ndërmarrjeve Shoqërore dhe përgatitjen e tyre për privatizim. Ai ishte, gjithashtu, edhe Kryetar i Ndërmarrjes Publike Banesore në Prishtinë, në Ibër-Lepenc si dhe në Qendrën e Rinisë, Kulturës dhe Sportit në Prishtinë. Më vonë, nga Zyra Civile Ndërkombëtare u emërua në programin e likuidimit në Agjencinë Kosovare të Privatizimit.