Qeveria Zvicerane ndihmon Agjencinë Kosovare të Pronës me fonde shtesë

Agjencia Zvicerane për Zhvillim dhe Bashkëpunim (SDC) ka përkrahur punën e Agjencisë Kosovare të Pronës (AKP) për vitin 2012  me një fond shtesë në vlerë prej  89.000 Euro.

Kjo mbështetje siguron kontributin e Qeverisë Zvicerane në respektimin e mandatit të Agjencisë Kosovare të Pronës për zgjidhjen e kontesteve pronësore të ndërlidhura me konfliktin që kanë të bëjnë me pronat e paluajtshme private përfshirë këtu pronat bujqësore dhe ato komerciale. Kjo ndihmesë ofrohet në kuadër të kornizës së bashkëpunimit teknik dhe financiar, si dhe të ndihmës humanitare të qeverisë Zvicerane në të mirë të Kosovës, e cila parasheh përmirësim e sundimit të ligjit.

Mbështetja për Agjencisë Kosovare të Pronës është kusht i domosdoshëm për vendosjen e rendit dhe ligjit, për promovimin e shërbimeve moderne dhe funksionale publike, duke mbështetur zhvillimin e sektorit ekonomik në Kosovë.  Qeveria  Zvicerane ka mbështetur në vazhdimësi AKP-në, që nga themelimi i saj, dhe ka kontribuuar në buxhetin e saj në vitet 2006-2012.