Një numër i madh i pronave bujqësore që janë aktualisht nën administrimin e Agjencisë Kosovare të Pronës (AKP) vazhdojnë të jenë të uzurpuara në mënyrë të paligjshme. Kjo gjë konsiderohet vepër penale sipas Nenit 332 të Kodit Penal të Kosovës të titulluar  “Uzurpimi i Paligjshëm i Pronës së Paluajtshme ”.

Për të gjithë ata persona që dëshirojnë ta shfrytëzojë pronën e dikujt tjetër, AKP-ja ofron mundësinë që pronat nën administrimin e saj, të shfrytëzohen legalisht përmes Skemës së Qirasë për Tokën Bujqësore. Për ta marrë me qira njërën prej këtyre pronave bujqësore, ekziston një procedure  shumë e thjeshtë dhe e jo e kushtueshme, e cila mund të kryhet në secilën prej Zyrave Regjionale të AKP-së në Kosovë. Nëse me të vërtetë jeni të interesuar ta merrni me qira, apo ta legalizoni shfrytëzimin e pronës të cilën ju aktualisht veç jeni duke e shfrytëzuar në mënyrë të paligjshme, inkurajoheni ta vizitoni njërën nga zyrat tona, ku mund të merrni sqarime të plota për procedurën që duhet ndjekur.

Me qëllim të përforcimit të sundimit të ligjit, si dhe realizimin e mandatit që i është dhënë për administrimin e këtyre pronave bujqësore, tash së fundmi AKP-ja  ka blerë një makinë për prerjen e kulturave të mbjella bujqësore.  Prandaj, çdo person që vazhdon uzurpimin dhe kultivimin e paligjshëm të pronës që është nën administrimin e AKP-së, rrezikon të humbas të gjitha kulturat bujqësore të mbjella në tokën e tjetërkujt. Për një veprim të tillë nuk do të paguhet asnjë kompensim dhe humbja e të mbjellurave, gjithashtu, do të jetë edhe humbje financiare për vetë uzurpuesin.

Personat, të cilët e kanë nënshkruar marrëveshjen për qira, si dhe në ndërkohë kanë paguar qiranë, nuk duhet të frikësohen, sepse ata tashmë e kanë të vendosur bazën ligjore për ta shfrytëzuar pronën, e cila është lëndë e kontratës për qiradhënie, dhe për rrjedhojë nuk do të ketë ndonjë intervenim nga AKP-ja. Po ashtu, uzurpuesit e paligjshëm nuk do të marrin asnjë njoftim shtesë për atë se AKP-ja do t’i shkatërrojë të mbjellurat, prandaj ky duhet të merret si njoftimi i fundit për faktin se të mbjellurat e kultivuara në mënyrë të paligjshme rrezikojnë të shkatërrohen.

Refuzimi për të legalizuar uzurpimin e pronës që jeni duke e shfrytëzuar nuk është vetëm shkelje e Kodit Penal, por është edhe veprim antikushtetues, sepse Mbrojtja e Pronës  është e garantuar me Nenin 46 të Kushtetutës së Republikës së Kosovës. Prandaj, AKP-ja u bën thirrje të gjithë atyre personave, që në mënyrë të paligjshme janë duke e shfrytëzuar pronën e tjetërkujt, e që janë nën administrimin e Agjencisë, që edhe një herë t’i shqyrtojnë me kujdes mundësitë e tyre dhe të vizitojnë njërën nga zyrat regjionale të AKP-së për të nënshkruar marrëveshjen qira, si mënyra e vetme për të legalizuar shfrytëzimin e pronës.