“Duhet ta mbajmë në mend se si rezultat i punës së palodhshme të Komisionit të Kërkesave Pronësore dhe Banesore, familjeve të cilat ishin detyruar të largohen nga shtëpitë apo pronat e tyre për shkak të politikave diskriminuese, u është mundësuar rifitmi i të drejtave që i kishin humbur më parë” – theksoi Zëvendësi i Përfaqësuesit  të Posaçëm i Sekretarit të Përgjithshëm në Kosovë (ZPSSP), Steven Schook në ceremoninë përmbyllëse të Komisionit të Kërkesave Pronësore dhe Banesore (KKPB) dhe inagurimit të Komisionit të Kërkesave Pronësore të Kosovës (KKPK), të mbajtur në Zyret Qendrore të UNMIK-ut në Prishtinë më 6 qershor.

Në ceremoni ishin të pranishëm më shumë se 50 mysafirë të njohur, përfshirë Kryeministrin e Kosovës, z.Agim Çeku dhe disa ministra tjerë nga Institucionet e Përkohshme Vetqeverisëse si dhe përfaqësues të UNMIK-ut, Habitatit të KB-së, OSBE-së, KFOR-it dhe disa zyreve ndërlidhëse që gjenden në Prishtinë.

KKPB-ja ishte themeluar përmes Rregullores së UNMIK-ut 1999/23 të shpallur më 15 nëntor 1999. Mandati i saj ishte përmirësuar me Rregulloren e UNMIK-ut 2000/60 të publikuar më 31 tetor 2000. Puna e KKPB-së ndryshoi humbjen diskriminuese të pronave të banimit që kishte ndodhur gjatë viteve 1989-1999, duke rregulluar shitjet jozyrtare dhe duke ua kthyer posedimin e pronave të banimit personave të zhvendosur për shkak të konfliktit të vitit 1999. Në përgjithësi, Drejtoratit të Çështjeve Pronësore Banesore (DÇPB) i ishin paraqitur 29,160 kërkesa prej të cilave KKPB-ja i ka shqyrtuar diku 26,790 sosh. Kërkesat e mbetura ishin tërhequr ose ishin vendosur drejtpërdrejtë nga DÇPB-ja.

Z. Schook theksoi se përfundimi i punës së DÇPB-së është një nder për popullatën e Kosovës, të cilët i ka lavdëruar për kurajon e treguar në ushtrimin e kthimit të së drejtave të tyre pronësore saktësisht sipas ligjit. Ai shtoi: “Jam posaçërisht krenar me këto të arritura, e jo vetëm për shkakun që kanë kthyer legjitimitetin e të drejtave pronësore në Kosovë duke krijuar një proces që mund të shfrytëzohet në vendet tjera ku të drejtat pronësore janë shkelur. Ky në të vërtetë është eksportim për të cilin Kosova duhet të jetë krenare!”

Kryeministri i Kosovës gjithashtu përgëzoi DÇPB-në për përmbylljen e mandatit. “KKPB-ja ka bërë një punë të madhe, duke u bazuar në ligjin dhe rregulloret ky Komision ka shqyrtuar mijëra kërkesa gjatë mandatit. Sot kemi rezultate të mira të punës së tyre, si një e arritur e madhe për Kosovën dhe qytetarët e saj” theksoi Çeku. Ai gjithashtu nënvizoi se respektimi i të drejtave pronësore private të të gjithë qytetarëve është po ashtu një hap përpara në përmbushjen e standardeve për zhvillim dhe integrim.

Kryesuesi i KKPB-së, z. Alan Dodson nga Afrika e Jugut, ia dorëzoi raportin përfundimtar të punës së Komisionit ZPSSP-së dhe Kryeministrit. “Besoj se puna dhe përvoja e Komisionit mund të shërbejnë si udhëzim për skenaret post-konfliktuoze ku ekziston nevoja për shqyrtimin e këtyre çështjeve” theksoi z. Dodson.

Në pjesën e dytë të ceremonisë, inagurimi i Komisionit të Kërkesave Pronësore të Kosovës (KKPK), ZPSSP-ja hapi ceremonin e dhënies së betimit nga anëtarët e KKPK-së. Ky inagurim shënoi hapin tjetër jetik në kthimin e të drejtave pronësore në Kosovë. Derisa KKPB-ja ka shqyrtuar vetëm kërkesat lidhur me pronat e banimit, KKPK-ja do të merret kryesisht me pronat komerciale dhe bujqësore. KKPK-ja është emëruar më 14 maj dhe anëtarë të saj janë: z. Veijo Heiskanen nga Finlanda (Kryesues), Norbert Wühler nga Gjermania dhe Aqif Tuhina nga Kosova. Të gjithë këta janë ekspert në fushën e së drejtës pronësore.

KKPK-ja ka juridiksion ekskluziv, i nënshtruar ndaj ankesës pranë Gjykatës Supreme të Kosovës, për zgjidhjen e kontesteve lidhur me pronat e paluajtshme private, përfshirë tokat dhe pronat bujqësore që janë si rrjedhojë e konfliktit të armatosur ndërmjet 27 shkurtit 1998 dhe 20 qershorit 1999.  Deri më tani janë paraqitur diku 22,380 kërkesa.