AKP vazhdon lëshimin me qira të  pronave bujqësore

Në mesin e shumë  detyrave të saj Agjencia Kosovare e Pronës (AKP) ka mandat të udhëheqë Skemën  Vullnetare të Qirasë për pronat që janë nën administrimin e AKP-së, me kërkesën  e paraqitësve të suksesshëm të kërkesave. Skema Vullnetare e Qirasë ua mundëson  pronarëve, apo bartësve të së drejtës pronësore (BDP), të marrin disa të  ardhura duke e autorizuar AKP-në që të japë me qira pronat e tyre derisa ata të  vendosin t’i shfrytëzojnë ato në një mënyrë tjetër. Skema, gjithashtu, ua mundëson  njerëzve të interesuar që të marrin me qira prona banesore, komerciale apo  bujqësore dhe këtë mund ta bëjnë këtë përmes AKP-së.

Për një pronar apo  BDP, Skema Vullnetare e Qirasë ofron mbrojtje ligjore dhe fizike për pronën e  tyre, dhe kur prona jepet me qira i siguron pronarit apo BDP-së të ardhura  modeste.  Për ata që zgjedhin t’i marrin  pronat me qira, Skema ua mundëson uzurpuesve të paligjshëm të legalizojnë shfrytëzimin  e pronës së huaj përmes një marrëveshjeje për qira të lidhur për një periudhë të  caktuar me AKP-në, e cila vepron në emër të pronarit apo BDP-së. Këto shërbime  të AKP-së aplikohen vazhdimisht në mënyrë të hapur dhe transparente; të gjitha  palët e përfshira trajtohen me kujdes.  

Aktualisht ka rreth  4,184 prona nën administrimin e AKP-së  prej  të cilave 2,911 janë prona banesore,   përgjegjësinë për të cilat AKP-ja e ka trashëguar nga paraardhësi i saj,  Drejtorati për Çështje Pronësore dhe Banesore. Numri i përgjithshëm i  pronave  përfshinë edhe rreth 1,268 prona,  të cilat kanë qenë lëndë e kërkesave të paraqitura drejtpërsëdrejti në AKP (1,210  bujqësore, 2 komerciale dhe 56 banesore). Deri më sot, rreth 955 prona janë  dhënë me qira dhe pritet që ky numër të rritet.

Qiraja mesatare e AKP-së për një pronë banesore në Kosovë është 60 Euro Qiraja  më e lartë e pranuar deri më sot është 209 € për një pronë prej 200m2 në  Prishtinë, ndërsa qiraja më e ulët e pranuar është 15 € për një pronë prej 25m2  në Kamenicë. Lartësia e qirasë ndryshon sipas lokacionit dhe madhësisë së  pronës si dhe gjendjes së saj.

Lartësia e qirasë për pronat bujqësore varet nga madhësia, klasa dhe  gjendja e tokës së dhënë me qira. Qiraja mund të jetë prej 20 deri 64 Euro në  vit dhe paguhet në baza vjetore.  

Ekziston një formulë  e përcaktuar për të llogaritur qiranë për pronat banesore, komerciale dhe  bujqësore e cila mund të gjendet në çdo kohë në ueb faqen e AKP-së. Shuma e  qirasë nuk është e diskutueshme as nga pronari apo BDP-ja as nga qiramarrësi. Nëse  pronari apo BDP-ja mendon se mund të marrë qira më të lartë për pronën e  tij/saj, ai/ajo mund ta tërheqë pronën nga Skema Vullnetare e Qirasë në çdo  kohë pas kryerjes së obligimeve kontraktuese në të cilat ka hyrë para se të  vendosë që ta tërheqë pronën nga Skema e Qirasë.

AKP-ja kohën e  fundit vëren interes të shtuar nga njerëzit që dëshirojnë të marrin me qira  prona bujqësore në regjionin e Gjilanit. Deri më tash AKP-ja ka arritur të japë  me qira 10 prona bujqësore dhe kryesisht njerëzit që i marrin këto prona  jetojnë aty afër. Kur paguhet qiraja, kjo ju ofron siguri qiramarrësve për t’i  mbjellë tokat pasi që AKP-ja nuk do t’i largojë ata para përfundimit të stinës  së të korrurave.

Për të interesuarit,  është shumë e lehtë të bëhen qiramarrës. Vetëm duhet shkuar në ndonjërën nga  Zyrat Regjionale të AKP-së ku do të ju jepen informatat dhe ndihma e nevojshme për  marrjen me qira të pronës nën Skemën e Qirasë së AKP-së.  

Të gjitha pronat bujqësore  në dispozicion për t’u dhënë me qira, do të kenë të vendosur një njoftim të  madh të gjelbër, në mënyrë që çdo person i interesuar për ta marrë një pronë me  qira, të shohë se prona është në dispozicion. Pronat në dispozicion për  qiradhënie  mund t’i gjeni, gjithashtu,  edhe në ueb faqen tonë: www.kpaonline.org.