Më 24 qershor 2011, është nënshkruar Projekt Marrëveshja ndërmjet Qeverisë së Kosovës, e përfaqësuar nga Ministria e Financave në emër të Agjencisë Kosovare të Pronës (AKP) dhe Qeverisë Zvicerane e përfaqësuar nga Departamenti Federal i Punëve të Jashtme, përmes Agjencisë Zvicerane për Zhvillim dhe Bashkëpunim (SDC) për të përkrahur punën e Agjencisë Kosovare të Pronës (AKP) në shumën prej 1,230,000 EURO. Marrëveshja është nënshkruar në emër të Qeverisë së Kosovës dhe AKP-së nga z. Ramadan Avdiu, Zëvendës Ministër i Financave dhe në emër të Qeverisë Zvicerane nga z. Samuel Waelty, Drejtor i Zyrës Zvicerane për Bashkëpunim në Kosovë.

Projekt Marrëveshja siguron kornizën ligjore për kontributin e Qeverisë Zvicerane në lidhje me mandatin e Agjencisë Kosovare të Pronës për zgjidhjen e kontesteve pronësore të ndërlidhura me konfliktin që kanë të bëjnë me pronat e patundshme private përfshirë pronat bujqësore dhe ato komerciale. Ky kontribut ofrohet në kuadër të kornizës së bashkëpunimit teknik dhe financiar dhe të ndihmës humanitare të qeverisë Zvicerane në të mirë të Kosovës, e cila parasheh përmirësim e sundimit të ligjit.

Zëvendës Ministri Avdiu falënderoi Qeverinë Zvicerane për ofrimin e ndihmës financiare për AKP-në pas nënshkrimit të ndihmës financiare për KPA-në, duke shtuar se Qeveria e Kosovës është e gatshme të garantojë të drejtat pronësore për të gjithë qytetarët e Kosovës.

Me këtë marrëveshje të nënshkruar të dy palët pajtohen se mbështetja e Agjencisë Kosovare të Pronës është kusht i domosdoshëm për vendosjen e rendit dhe ligjit, për promovimin e shërbimeve moderne dhe funksionale publike, duke mbështetur zhvillimin e sektorit ekonomik në Kosovë.

Qeveria Zvicerane ka mbështetur AKP-në që nga themelimi i saj dhe ka kontribuuar në buxhetin e saj në vitet 2006-2010.

Projekti i Marrëveshjes mbulon periudhën nga 25 qershori 2011 deri më 31 dhjetor 2013.