AKP-ja nënshkroi Memorandumin e Mirëkuptimit me  Policinë e Kosovës

Sot, me 19 tetor 2009, në ambientet e Policisë së Kosovës (PK) u nënshkrua Memorandumi i Mirëkuptimit MiM, në mes Agjencisë Kosovare të Pronës (AKP), të përfaqësuar nga Drejtori Ekzekutiv Scott Bowen dhe Policisë së Kosovës, të përfaqësuar nga Z. Shpend Maxhuni, Zëvendës Drejtor Gjeneral i Operativës.

Qëllimi i këtij MiM është të përcaktohen obligimet paraprake dhe procedurat e duhura të palëve nënshkruese, AKP-së dhe PK, lidhur me mbështetjen e PK, sipas kërkesës së arsyeshme të bërë nga AKP-ja, në zbatimin e dëbimeve.

“Policia e Kosovës është e kënaqur që e mbështet Agjencinë Kosovare të Pronës në përmbushjen e objektivave dhe mandatit të saj, që ka  filluar nga viti 2003 me Policinë e UNMIK-ut në atë kohë. Në vitin 2005, një Memorandum i Mirëkuptimit ishte nënshkruar nga ana e Policisë së UNMIK-ut, kurse tani me mandatin dhe përgjegjësitë e reja, Policia e Kosovës do të vazhdojë dhe do të thellojë mbështetjen për AKP-në” tha Z.Shpend Maxhuni, Zëvendës Drejtor Gjeneral i Operativës në PK

Z. Scott Bowen, Drejtor Ekzekutiv i  AKP-së falënderoi Policinë e Kosovës për mbështetjen e tyre të vazhdueshme që i kanë dhënë AKP-së që vërtetohet me nënshkrimin e këtij MiM. Ai falënderoi gjithashtu kolegët e EULEX-it për mbështetjen e tyre.

Z. Bowen deklaroi “Dëbimi është një pjesë e detyrave publike për të cilat është mandatar AKP-ja  dhe përfshin dëbimin e çdo banori të paligjshëm pa marrë parasysh përkatësinë etnike, racën apo religjionin nga prona që gjendet nën administrimin e AKP-së, përfshirë edhe Skemën Vullnetare të Qirasë që zbatohet nga AKP-ja.  Kjo iu mundëson bartësve të së drejtës pronësore të gëzojnë të drejtën e tyre të patjetërsueshme mbi pronën e tyre.

Njëra nga format kryesore të dëbimit që duhet të kryej  AKP-ja ndërlidhet me skemën vullnetare të qirasë. Këto dëbime nuk do të ishin të nevojshme nëse banori e paguan qiranë sipas marrëveshjes së nënshkruar të qirasë. Do t’i inkurajoja të gjithë personat që kanë fatura të papaguara, që t’i paguajnë ato sa më shpejt që të jetë e mundur në mënyrë që ta shfrytëzojnë pronën që e kanë marrë me qira pa pasur nevojë të dëbohen nga ana e AKP-së.”

“Të gjithë personat që nuk i kryejnë obligimet e tyre do të marrin një paralajmërim të fundit nga AKP-ja që ju kërkon ose t’i lirojnë objektet ose ta paguajnë në tërësi qiranë sipas marrëveshjes. Nëse personi vendos të mos e paguajë borxhin deri në afatin e dhënë, ai NUK DO TË KETË MUNDËSI TË PAGUAJË  qiranë pas këtij afati në asnjë mënyrë  pasi që AKP-ja do ta shkëpusë kontratën e qirasë dhe ata do të dëbohen me mbështetjen e Policisë sipas MiM që u nënshkrua sot. Pastaj duhet të bëhet kontrata e re e qirasë dhe të hollat që AKP-ja mban si depozitë nga kontrata e mëparshme nuk kthehen” shtoi Z. Bowen   

Në fund Z. Bowen përsëri falënderoi Policinë e Kosovës për mbështetjen e tyre të vazhdueshme në mandatin që i është dhënë AKP-së sipas Ligjit 03/L-079 të Kuvendit të Kosovës.

Deri më tani, Agjencia Kosovare e Pronës ka vendosur mbi  22 863 kërkesa, që është mbi 50% nga gjithsejt 40 644 kërkesa të regjistruara, dhe zbatimi i vendimeve do të vazhdojë deri në vendimin e fundit.