Qeveria Britanike përkrahë Agjencinë Kosovare për Prona me fonde shtesë

Sot, më 12 tetor 2009, ne hapësirat e Ministrisë së Ekonomisë dhe Financave u bë nënshkrimi i Kontratës së Donacionit ndërmjet Qeverisë së Kosovës dhe Qeverisë së Mbretërisë së Bashkuar, për ndihmë punës së Agjencisë Kosovare për Prona (AKP) në vlerë prej £500.000 (pesëqind mijë funta stërlina). Kontratën e Donacionit, në emër të Qeverisë së Republikës së Kosovës dhe Agjencisë Kosovare për Prona e nënshkroi z. Ahmet Shala, Ministër i Ekonomisë dhe Financave dhe Ekselencës së Tij z. Andy Sparkes Ambasador i Mbretërisë së Bashkuar në Kosovë.

Ministri Shala me këtë rast falënderoi qeverinë e Mbretërisë së Bashkuar për ndihmën financiare të ofruar Agjencisë Kosovare të Pronave. “Duke iu falënderuar kësaj ndihme financiare, Agjencia Kosovare e Pronës do të ngrisë kapacitetet e saja njerëzore, duke krijuar një personel të kualifikuar dhe profesional në zgjidhjen e të gjitha rasteve të pronës së kontestuar në Kosovë, duke bërë që të gjithë njerëzit, pa dallim etnie, feje apo race të gëzojnë të drejtën e tyre të patjetërsueshme në pronë”, tha Ministri Shala pas nënshkrimit të marrëveshjes për përkrahjen financiare të AKP-së, duke shtuar se Qeveria e Kosovës ka vullnet në garantimin e të drejtës në pronë për të gjithë qytetarët e Kosovës.

Ambasadori Sparkes tha se është shumë kënaqur që Qeveria e Mbretërisë së Bashkuar ka kontribuar për punën e rëndësishme të AKP-së siç është zgjidhja e çështjeve pronësore duke ndihmuar në zgjidhjen e konfliktit. “Duke qenë Ambasador i Mbretërisë së Bashkuar në Kosovë si dhe drejtues i Bordit Mbikëqyrës të Agjencisë Kosovare të Pronës kam kënaqësinë e ofrimit të fondeve nga ana e qeverisë që unë përfaqësoj, të dedikuar agjencisë e cila ka një mandat të vështirë në përcaktimin e pronësisë mbi pronën e kontestuar dhe se ky donacion komplementon fondet e dhëna nga ana e Qeverisë së Kosovës dhe donacionet tjera të dhëna AKP-së”. Ambasadori Sparkes shtoi se AKP-ja deri më tani ka kryer një punë mjaft të vlefshme në zgjidhjen e më shumë se gjysmës së rasteve të rreth 40.000 kërkesave pronësore të paraqitura në agjenci.