Marrëveshje mirëkuptimi u nënshkrua me Agjencinë Kadastrale të Kosovës

Më 13 korrik 2009, në ambientet e Ministrisë së Administratës Publike në Prishtinë, Zëvendës Drejtori i Agjencisë Kosovare të Pronës z. Xhevat Azemi në emër të agjencisë nënshkroi me Kryeshefin Ekzekutiv të Agjencisë Kadastrale të Kosovës z. Hamit Basholli. Qëllimi i kësaj marrëveshje është që të sigurohet bashkëpunimi i plotë ndërmjet dy agjencive duke ofruar informacione të nevojshme nga ana e Agjencisë Kadastrale të Kosovës për AKP-në te cilat do të ndihmojnë në rritjen e efikasitetit në zgjidhjen e kontesteve pronësore në Kosovë. Z. Azemi njoftoi të pranishmit mbi mandatin e AKP-së, rregullativën e saj ligjore dhe mënyrën e qasjes së zgjidhjes të kërkesave pronësore të paraqitura ne agjenci. Në AKP janë parashtruara 40.623 kërkesa pronësore prej të cilave rreth 54% janë zgjedhur njoftoi z.Azemi, duke u ndalur në veçanti në procedurat e zgjidhjes së rasteve kontestuese nga momenti i paraqitjes së kërkesave deri në marrjen e vendimit dhe zbatimin e tij.

Të pranishëm gjatë nënshkrimit të kësaj marrëveshje ishin edhe z. Arsim Bajrami, Ministër i Administratës Publike dhe Znj. Anna Jackson Zëvendës Ambasadore e Britanisë së Madhe në Kosovë. Pas nënshkrimit të marrëveshjes, Znj. Jakson rikonfirmoi edhe një herë mbështetjen e vazhdueshme të Britanisë së Madhe ndaj Agjencisë Kosovare të Pronës dhe përshëndeti formalizimin e bashkëpunimit ndërmjet dy agjencive respektive. Në anën tjetër z. Bajrami inkurajoi thellimin e bashkëpunimit të mëtutjeshëm ndërmjet agjencive dhe në emër të Qeverisë së Kosovës falënderoi të gjithë partnerët ndërkombëtar që po e përkrahin punën e Agjencisë Kosovare të Pronës gjatë këtyre viteve.