QEVERIA BRITANIKE ZOTON FONDE TË MËTUTJESHME PËR AGJENCINË KOSOVARE TË PRONËS

Me 15 maj 2008 Qeveria Britaneze i zotoi AKP-së fonde të mëtutjeshme në vlerë prej £500,000, që t’i mundësojë AKP-së të vazhdojë t’i ofrojë mbështetje bartësve të zhvendosur të së drejtës pronësore duke zgjidhur kontestet pronësore që janë pasojë e konfliktit të armatosur në vitet 1998-1999.

Ambasadori Britanik në Kosovë, Z. Andy Sparkes dhe Zëvendës  Përfaqësuesi Special i Sekretarit të Përgjithshëm në Kosovë (ZPSSP), Z. Larry Rossin, nënshkruan Memorandumin e Mirëkuptimit duke ofruar fonde shtesë për AKP-në. Qeveria Britanike e ka mbështetur AKP-në në të kaluarën dhe Z. Sparks tha se Qeveria Britanike “është shumë e kënaqur që mund të vazhdojë mbështetjen për AKP-në në vitin 2008”.

Në AKP është paraqitur numri i përgjithshëm prej 39,583 kërkesave për prona të paluajtshme banesore, bujqësore dhe komerciale për t’u zgjidhur. Fondet shtesë të ofruara nga Qeveria Britanike do t’i mundësojnë AKP-së të vazhdojë zgjidhjen e kërkesave dhe i tërë procesi i AKP-së pritet të përfundojë në vitin 2010.

Ceremonia e nënshkrimit është hapur nga Z. Rossin i cili në fjalimin e tij tha “Unë jam i kënaqur me bashkëpunimin në mes të AKP-së dhe Qeverisë Britanike. Kam kënaqësinë të nënshkruaj këtë marrëveshje për dhurim të fondeve AKP-së. Është shenjë e mirë që AKP-së i mundësohet të vazhdojë punën e saj në të mirë të të gjithë qytetarëve të Kosovës”.

Z. Rossin gjithashtu e ka shfrytëzuar rastin të inkurajojë qeveritë dhe institucionet tjera për të mbështetur AKP-në.

Gjatë ceremonisë së nënshkrimit, Ambasadori Britanik në Kosovë, Z. Sparkes tha "Ne dëshirojmë qe njerëzve t’u kthehen shtëpitë dhe pronat. Ky fond do të mbështes dhe ndihmojë njerëzit në Kosovë që të ndërtojnë një të ardhme të sigurt për vetveten".