Delegacioni i AKP-së, në përbërje të Drejtorit Ekzekutiv z.Knut Rosandhaug, zv/Drejtorit. Z.Xhevat Azemi, udhëheqësit e Zyrave Rajonale të AKP-së në këto komuna, si dhe stafi tjetër përcjellës nga Njësia për Informim në HQ, gjatë këtyre vizitave takoi kryetarët e këtyre Komunave si dhe përfaqësues  të strukturave komunale si dhe institucioneve tjera vendore dhe ndërkombëtare që veprojnë nëpër këto rajone, siç janë OSBE, UNMIK, etj. 
Realizimi i këtyre vizitave u bë në kuadër të planifikimit të një faze të re të fushatës mobile të AKP-së, por tash në nivel më të lartë përfaqësues. 
Vizita e parë, më 15 janar 2008, te kryetari i Komunës së Istogut, z.Fadil Ferati më bashkëpunëtorë, ishte interesant për vet faktin se kjo Komunë prin për nga numri i kërkesave të paraqitura në AKP.

“Është në interesin e përbashkët për të bashkëpunuar dhe për të marrë pjesë aktivisht në proces, sepse vetëm në këtë mënyrë do të mund të sigurohemi se AKP-ja i procedon profesionalisht lëndët dhe Komisioni merr vendime të drejta për kërkesat që janë paraqitur. Na nevojitet sigurimi i dokumentacionit valid për pronat, si dhe verifikimi i atyre dokumenteve që kanë prezantuar palët për të shmangur çfarëdolloj gabimi eventual”, tha z.Knut Rosandhaug, Drejtor Ekzekutiv i AKP-së. Pasi falënderoi autoritetet Komunale të Istogut, veçanërisht Drejtorinë për Kadastër dhe Gjeodezi për një bashkëpunim korrekt me zyrtarët e AKP-së, z.Rosandhaug premtoi një angazhim për bashkëpunim më intensiv me Komunën e Istogut gjithnjë në zbatim të ligjit dhe garantimin e së drejtës pronësore për të gjithë qytetarët e Kosovës.
Nga ana e tij, Kryetari i Komunës së Istogut z.Fadil Ferati falënderoi menaxhmentin e lartë të AKP-së për vizitën e realizuar dhe premtoi angazhim maksimal për shqyrtimin dhe zgjidhjen sa më të shpejtë dhe sa më të drejtë të të gjitha kërkesave që janë paraqitur në AKP.
“Mua po më “tmerron” numri kaq i madh i këtyre kërkesave në Komunën tonë, mirëpo ju premtoj që angazhimi ynë nuk do të mungojë për asnjë moment”, tha mes tjerash z.Ferati, me rastin e pranimit nga ana e Drejtorit Rosandhaug të Listës me mbi 5 mijë kërkesa në Komunën e Istogut.
Në këtë takim ishin prezent edhe Nënkryetari aktual i Kuvendit Komunal të Istogut, pastaj,  Drejtori aktual për Gjeodezi dhe Kadastër, ish-Kryeshefi Ekzekutiv, përfaqësues të Zyrës Rajonale të OSBE-së dhe UNMIK-ut.

Pas takimit me Kryetarin Ferati, Delegacioni i AKP-së i bëri vizitë fshatit Dobrushë, me ç‘rast bashkëbisedoi më afër me banorët e këtij fshati për çështjet e kontesteve pronave si dhe nevojën e pjesëmarrjes në proces të të gjitha palëve të interesuara.
“Klina mund të konsiderohet si një shembull i ekzekutimit të mbi 99.9 % të vendimeve të ish-DÇPB-së, dhe është e pakuptueshme që dalin 2 raste dhe krijojnë një imazh të keq në opinion si për AKP-në ashtu edhe për Komunën”, tha z.Rosandhaug në fillim të takimit me Kryetarin e ri të Komunës së Klinës, z.Sokol Bashota. Pasi e uroi për detyrën e re në krye të komunës, z.Rosandhaug sqaroi keqkuptimet dhe keqinterpretimet mediale që kanë dalë vitin e kaluar për nivelin e bashkëpunimit në mes AKP-së dhe komunave. Ndërsa, Kryetari Bashota theksoi se ai është i vetëdijshëm për sfidat që e presin në detyrën e re, por është plotësisht i gatshëm që të bashkëpunojë me AKP-në, në mënyrë që ky numër i kërkesave të paraqitura ta marrë zgjidhje të shpejt dhe të drejtë, pa marrë parasysh se nga cili grup etnik janë paraqitur.
Me ketë rast kryetarit Bashota dhe bashkëpunëtorëve të tij, iu dorëzua Lista me numrin e kërkesave të paraqitura që janë mbi 3000 mijë, vetëm në këtë komunë.

Ekipi i AKP-së, i kryesuar nga Drejtori Rosandhaug dhe Zv/Drejtori Azemi vizituan fshatin Tërsnik, i cili është kryesisht i banuar nga minoriteti serb,  ku nga përafërm u njohën me shqetësimet që ata kanë në lidhje me mosmarrëveshjet pronësore. Drejtuesit e AKP-së, edhe me këtë rast inkurajuan banorët e fshatit që të bëhen pjese e procesit të shqyrtimit dhe vendimit për kërkesat e paraqitura, sepse në të kundërtën ata do ta humbasin një shans që të përfaqësojnë dhe mbrojnë çfarëdo lloj interesi që ata kanë në lidhje me një pronë të caktuar, për të cilën është bërë kërkesë.

Edhe në Komunën e Pejës takimi në mes Zyrtarëve të AKP-së dhe Kryetarit të ri të Komunës, z.Ali Berisha me bashkëpunëtorë, u zhvillua në një frymë miqësore dhe konstruktive, ku të dyja palët u zotuan për thellimin e bashkëpunimit reciprok. Pas këtij takimi, “stacioni” i radhës ishte fshati Dobërdol ku banorët e kësaj ane patën rastin të njoftohem më përafërm dhe më detajisht për mandatin e AKP-së si dhe fazat e procedimit të kërkesës deri në vendimmarrje dhe zbatimin e vendimit si akt final.

“Jam zotuar se gjithnjë dhe gjithmonë do të jem në shërbim të qytetarëve dhe pjesë e këtij shërbimi do të jetë edhe angazhimi për respektimit e ligjit në garantimin e të drejtës pronësore për të gjithë qytetarët e komunës sonë pa dallim”, tha në fillim të takimit me delegacionin e AKP-së, Kryetari i Ferizajt z.Bajrush Xhemaili. Ai pranoi faktin se si person i ri në këtë detyrë nuk ka pas dijeni për një numër kaq të madh të kërkesave në këtë komunë, më pak se 3 mijë, por megjithatë ai shfaqi bindjen se me një angazhim dhe bashkëpunim të dyanshëm dhe të vazhdueshëm do të arrihet zgjidhja ligjore dhe e drejt për këto kërkesa.
Fshati Nerodime për një kohë është cilësuar si një fshat “problematik” për realizimin e procesit të notifikimit nga ana e ekipeve në AKP-së. Por, pas vizitës së delegacionit të KPA-së, me në krye Drejtorin Rosandhaug, dhe takimit me kryetarin e këtij fshati, si duket paragjykimi që ka ekzistuar për AKP-në është minimizuar dhe kryetari i fshatit premtoi se nuk do të ketë probleme “teknike” për ekipet e AKP-së që ta kryejnë punën e tyre të përditshme në terren.

Takimi me kryetarin e Komunës së Prizrenit ishte paksa më i veçantë. Më i vjetri për nga mosha, por në Zyrën me luksoze të mundshme, z.Ramdan Muja qysh në fillim të takimit pranoi, se meqë ai është zgjedhur rishtas në këtë detyrë, nuk ka shumë dijeni për punën dhe funksionimin e AKP-së. Me këtë rast, z/Drejtori i KPA-së, z.Xhevat Azemi përmbledhtazi e informoi z.Muja për historikun dhe mandatin e AKP-së si dhe për strukturën organizative të kësaj Agjencie. Takimi u zhvillua në frymën e zotimit për kontakte më të shpeshta në mes të autoriteteve komunale të Prizrenit dhe AKP-së. Më pas, nga përfaqësuesit e AKP-së iu bë vizitë fshatit Novakë, shumica prej tyre të shtyrë në moshë që jetojnë në shtëpitë e rindërtuara pas konfliktit.

Vlen të theksohet fakti, se shumica e këtyre takimeve janë përcjellur nga një numër i konsiderueshëm i medieve të shkruara dhe atyre elektronike, si ato lokale po ashtu edhe nacionale.  

Përveçse një jave dinamike dhe “të lodhshme” me takimet protokollare, këto ditë sollën një fazë shumë interesante të fushatës mobile të AKP-së, në përpjekje për të krijuar një imazh të ri për Agjencinë, si Agjenci që angazhohet për zbatimin e ligjit dhe garantimin e pronës private.

Kampanja me Autobus do të vazhdojë edhe në Komunën e Mitrovicës si dhe atë të kryeqytetit, Prishtinës.