AKP-ja  kërkon ndjekje penale në Pejë

Agjencia Kosovare e Pronës (AKP), ka kërkuar nga Prokurori publik i komunës së Pejës që të fillojë procedurë penale kundër autorit/autorëve të krimit, të cilët në mënyrë joligjore thyen plumbimin të vendosur nga AKP-ja në pronën, e cila gjendet në rrugën “Shaban Spahija” në Pejë.

Prona në fjalë është pronë banesore, e cila gjendet në kompleksin e ndërtesës së njëjtë të Shkollës Fillore “Asdreni”. Duke pasur parasysh vendimin e ligjshëm të lëshuar nga Komisioni për Kërkesa Pronësore dhe Banesore (KKPK), zyrtarët e AKP-së kanë mbyllur dhe plumbuar pronën e banimit me 25 shtator 2007. Më vonë, plumbimi zyrtar ishte hequr pa ndonjë arsyetim ligjor, akt i cili paraqet shkelje të nenit 259 të Kodit të Përkohshëm Penal të Kosovës.

AKP-ja thërret të gjithë banorët dhe institucionet e Kosovës që të respektojnë sundimin e ligjit dhe vendimet e ligjshme të marra në pajtim me ligjet e aplikueshme në Kosovë. Vendimi për të plumbuar pronën e sipërpërmendur ishte marrë në pajtim me vendimin e ligjshëm të lëshuar nga KKPK. Nëse ndokush dëshiron të kontestoj vendimin e lëshuar nga KKPK, ata duhet ta bëjnë atë duke u ankuar ndaj vendimeve në organin kompetent ligjor, e jo duke e marrë ligjin në duart e tyre.

AKP-ja mbetet e përkushtuar për të siguruar mbrojtje të pronës private brenda juridiksionit të vet për të gjithë banorët e Kosovës, pa ndonjë përjashtim. AKP-ja do të vazhdoj të zbatoj vendimet e lëshuara nga KKPK, e gjithashtu edhe vendimet e lëshuara nga Komisioni i ri Kosovar për Kërkesa Pronësore. AKP-ja, nëse është e domosdoshme përkitazi me rastet e reja do të vazhdojë të kërkojë nga prokurorët vendor të iniciojnë procedurë penale kundër çdo individi privat apo zyrtarëve publik, të cilët tentojnë me mjete të paligjshme të pengojnë implementimin dhe zbatimin e vendimeve të ligjshme.

Agjencia Kosovare e Pronës (AKP) është organ i pavarur i themeluar me 4 mars 2006. Ajo ka mandat të zgjidhë kërkesat të cilat janë si rezultat i konfliktit të armatosur të viteve 1998 dhe 1999. AKP gjithashtu është pasardhëse ligjore e ish Drejtoratit për Çështje Pronësore dhe Banesore (DÇPB).