Gjykatat vendore i dorëzojnë kërkesat AKP-së

Dje me 1 Mars, 110 kërkesa për prona private të paluajtshme që janë si rrjedhë e konfliktit të armatosur në Kosovë gjatë viteve 1998 dhe 1999 i janë dorëzuar Agjencisë Kosovare të Pronës (AKP), e cila është e pavarur, nga ana e Gjykatës Komunale në Prishtinë. Kërkesat të cilat i janë dorëzuar AKP-së ishin paraqitur pranë Gjykatës Komunale në Prishtinë nga individë të cilët pohojnë se kanë humbur të drejtat e tyre pronësore si rezultat i konfliktit të armatosur. Këto kërkesa i ishin paraqitur Gjykatës Komunale para themelimit të AKP-së më 4 mars 2006 dhe kërkesat ishin në pritje në gjykatë.

Në bazë të Rregullores së UNMIK-ut 2006/50, AKP-ja ka juridiksion ekskluziv, i nënshtruar ndaj ankesës pranë Gjykatës Supreme të Kosovës, për zgjidhjen e kërkesave lidhur me pronat e paluajtshme private përfshirë pronat komerciale dhe tokat bujqësore.  Është parakusht që kërkesat të jenë rrjedhojë e konfliktit të armatosur të viteve 1998 dhe 1999 në mënyrë që të bien nën juridiksionin ekskluziv të AKP-së.

Neni 18 i Rregullores parasheh që të gjitha gjykatat në Kosovë, që kanë pranuar kërkesa për pronat private të paluajtshme që janë si rrjedhojë e konfliktit të armatosur, para themelimit të AKP-së t’ia dorëzojnë ato kërkesa AKP-së. Kërkesat e vetme që bëjnë përjashtim nga kjo dispozitë janë ato kërkesa për të cilat procedurat gjyqësore tashmë kishin filluar para datës 4 mars 2006.

Dorëzimi i kërkesave i bërë dje ishte i pari nga disa dorëzime nga  gjykatat në Kosovë që parashihet të bëhen. AKP-ja pret që t’i dorëzohen 900 kërkesa në përgjithësi. Pas dorëzimit të kërkesave nga gjykatat, ato do të përpunohen nga AKP-ja dhe vendimi mbi to do të merret nga Komisioni i Kërkesave Pronësore i Kosovës (KKPK), që është i pavarur. KKPK-ja përbëhet nga dy komisionerë ndërkombëtarë dhe një komisioner vendor, të cilët janë ekspertë në lëminë e ligjit mbi pronat. Kundër vendimeve të KKPK-së mund të paraqitet ankesë pranë Gjykatës Supreme të Kosovës.

AKP-ja u apelon të gjithë individëve që kanë paraqitur kërkesa të tilla pranë gjykatave në Kosovë që të kontaktojnë njërën nga zyrat e AKP-së, sa më shpejtë që të munden, me qëllim që të informohen lidhur me procedurat rreth kërkesave të tyre.