Në konferencën e donatorëve të AKP-së më 1 nëntor përfaqësuesit nga komuniteti ndërkombëtar si dhe IPVQ rikonfirmuan mbështetjen e tyre për punën e rëndësishme të zgjidhjes së kontesteve pronësore të lindura si pasojë e konfliktit në Kosovë.

Zëvendës Përfaqësuesi Special i Sekretarit të Përgjithshëm të Kombeve të Bashkuara në Kosovë (PDSRSG) Steven P. Schook kryesoi konferencën e donatorëve të organizuar nga Bordi Mbikëqyrës i Agjencisë Kosovare për Prona (AKP) në Zyrën Qendrore të UNMIK-ut më 1 nëntor. Në takim morrën pjesë Haki Shatri, Ministër i Ekonomisë dhe Financave, Ardian Gjini, Ministër i Ambientit dhe Planifikimit Hapësinor, përfaqësuesit e 15 zyrave diplomatike dhe organizatave donatore, Unioni Evropian, OSBE-ja, KFOR-i, UNDP-ja dhe UNHCR-i.

Duke përcjellur nxjerrjen e Rregullores së UNMIK-ut Nr. 2006/50 të datës 16 tetor 2006 ZPSSP njoftoi të pranishmit me mandatin e ri të AKP-së. AKP-ja ka tani një juridiksion të veçantë për të zgjidhur kërkesat për riposedim të pronës së paluajtshme private, duke përfshirë pronat komerciale dhe tokën bujqësore, që janë të lidhura në mënyrë të drejtpërdrejtë apo janë rezultat i konfliktit të armatosur të vitit 1998 dhe 1999. Gjykata Supreme e Kosovës do të jetë organi i ligjshëm që do te shqyrtojë ankesat në lidhje me këto kërkesa.

“Puna e AKP-së jo vetëm që do të sigurojë zgjidhjen e drejtë dhe të shpejtë të kontesteve pronësore nga konflikti, por ajo është gjithashtu me rëndësi vitale për kthim të qëndrueshëm dhe të krijojë një ambient të favorshëm  për zhvillim ekonomik,” tha
Z. Schook. “Zgjidhja e këtyre kontesteve është qartazi një kusht paraprak për joshje të nevojshme të investimit në Kosovë dhe i domosdoshëm  për promovimin e zhvillimit ekonomik dhe prosperitetit në regjion,” shtoi ai.

Duke njoftuar shtypin pas konferencës së donatorëve, ZPSSP tha, “Ne kemi përpiluar një sistem shumë të mirë, një sistem shumë të drejtë, që merr parasysh të drejtat individuale, që merr parasysh nevojat e shoqërisë dhe që ndan kompensimet nga vendimet për prona. Ky është një sistem që është përpiluar nga mësimet e marra nga të dyja, si nga përvojat tona pronësore këtu në Kosovë ashtu edhe nga ato brenda bashkësisë ndërkombëtare”.

Drejtori Ekzekutiv i AKP-së Knut Rosandhaug informoi se deri tani janë pranuar gati 4.000 kërkesa prej 11.000 kërkesave që priten të bëhen. AKP-ja do të fillojë tani të shqyrtojë kërkesat e pranuara dhe vendimet e para priten të dorëzohen në fillim të këtij viti.

Në konferencën e donatorëve Zvicra konfirmoi donacionin e tyre në vlerë prej 1 milion euro që do të shpërndahen brenda tri viteve (2006-2008). Qeveria e Serbisë ofroi të ndihmojë në mbulimin e shpenzimeve të reklamimit për fushatën e ardhme mediale të AKP-së. Përveç këtyre, AER, MB, SHBA, Norvegjia, UNMIK-u dhe Qeveria e Kosovës tashmë i kanë bërë zotimet ndaj AKP-së.